ਸੀ ਬੀ ਆਈ ਵੱਲੋਂ ਅਨਿਲ ਅੰਬਾਨੀ ਦੇ ਪੁੱਤਰ ਖ਼ਿਲਾਫ਼ ਕੇਸ

ਨਵੀਂ ਦਿੱਲੀ : ਸੀ ਬੀ ਆਈ ਨੇ ਉਦਯੋਗਪਤੀ ਅਨਿਲ ਅੰਬਾਨੀ ਦੇ ਪੁੱਤਰ, ਜੈ ਅਨਮੋਲ ਅਨਿਲ ਅੰਬਾਨੀ ਅਤੇ ਰਿਲਾਇੰਸ ਹੋਮ ਫਾਈਨਾਂਸ ਲਿਮਟਿਡ ਦੇ ਖ਼ਿਲਾਫ਼ ਯੂਨੀਅਨ ਬੈਂਕ ਆਫ ਇੰਡੀਆ ਵਿੱਚ ਕਥਿਤ ਧੋਖਾਧੜੀ ਦੇ ਮਾਮਲੇ ਵਿੱਚ ਕੇਸ ਦਰਜ ਕੀਤਾ ਹੈ, ਜਿਸ ਨਾਲ ਸਰਕਾਰੀ ਬੈਂਕ ਨੂੰ 228 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ ਹੈ। ਉਨ੍ਹਾ ਦੱਸਿਆ ਕਿ ਸੀ ਬੀ ਆਈ ਨੇ ਬੈਂਕ (ਪਹਿਲਾਂ ਆਂਧਰਾ ਬੈਂਕ) ਦੀ ਸ਼ਿਕਾਇਤ ’ਤੇ ਰਿਲਾਇੰਸ ਹੋਮ ਫਾਈਨਾਂਸ ਲਿਮਟਿਡ, ਜੈ ਅਨਮੋਲ ਅਨਿਲ ਅੰਬਾਨੀ ਅਤੇ ਰਵਿੰਦਰ ਸ਼ਰਦ ਸੁਧਾਕਰ ਜੋ ਰਿਲਾਇੰਸ ਹੋਮ ਫਾਈਨਾਂਸ ਲਿਮਟਿਡ ਵਿੱਚ ਦੋਵੇਂ ਡਾਇਰੈਕਟਰ ਹਨ, ਦੇ ਖ਼ਿਲਾਫ਼ ਕਾਰਵਾਈ ਕੀਤੀ ਹੈ। ਸ਼ਿਕਾਇਤ ਵਿੱਚ ਕਿਹਾ ਗਿਆ ਹੈ ਕਿ ਕੰਪਨੀ ਨੇ ਕਾਰੋਬਾਰੀ ਜ਼ਰੂਰਤਾਂ ਲਈ ਬੈਂਕ ਦੀ ਮੁੰਬਈ ਸਥਿਤ ਐਸ ਸੀ ਐਫ ਸ਼ਾਖਾ ਤੋਂ 450 ਕਰੋੜ ਰੁਪਏ ਤੱਕ ਦੀ ਕ੍ਰੈਡਿਟ ਲਿਮਟ ਲਈ ਸੀ। ਬੈਂਕ ਨੇ ਸਮੇਂ ਸਿਰ ਅਦਾਇਗੀ, ਵਿਆਜ ਅਤੇ ਹੋਰ ਖਰਚਿਆਂ ਦੀ ਸੇਵਾ ਅਤੇ ਸੁਰੱਖਿਆ ਦੀ ਸਥਿਤੀ ਤੇ ਹੋਰ ਲੋੜੀਂਦੇ ਕਾਗਜ਼ਾਤ ਸਮੇਂ ਸਿਰ ਜਮ੍ਹਾਂ ਕਰਾਉਣ ਅਤੇ ਪੂਰੀ ਵਿਕਰੀ ਦੀ ਆਮਦਨ ਨੂੰ ਬੈਂਕ ਖਾਤੇ ਰਾਹੀਂ ਭੇਜਣ ਸਮੇਤ ਵਿੱਤੀ ਅਨੁਸ਼ਾਸਨ ਬਣਾਈ ਰੱਖਣ ਦੀ ਸ਼ਰਤ ਰੱਖੀ ਸੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਕੰਪਨੀ ਬੈਂਕ ਨੂੰ ਕਿਸ਼ਤਾਂ ਦਾ ਭੁਗਤਾਨ ਕਰਨ ਵਿੱਚ ਅਸਫਲ ਰਹੀ ਅਤੇ ਇਸ ਲਈ ਉਕਤ ਖਾਤੇ ਨੂੰ 30 ਸਤੰਬਰ, 2019 ਨੂੰ ਗੈਰ-ਕਾਰਗੁਜ਼ਾਰੀ ਅਸਾਸੇ (ਐੱਨ ਪੀ ਏ) ਵਜੋਂ ਵਰਗੀਕਿ੍ਰਤ ਕੀਤਾ ਗਿਆ ਸੀ।