ਬੀਜਿੰਗ : ਚੀਨ ਨੇ ‘ਸ਼ੇਨਜ਼ੇਨ-ਜ਼ੋਂਗਸ਼ਾਨ ਲਿੰਕ’ ਦਾ ਉਦਘਾਟਨ ਕੀਤਾ ਹੈ। ਇਹ 28 ਕਿੱਲੋਮੀਟਰ ਲੰਬਾ ਇੱਕ ਬਹੁਤ ਹੀ ਸ਼ਾਨਦਾਰ ਸਮੁੰਦਰੀ ਕਾਰੀਡੋਰ ਹੈ, ਜਿਸ ਵਿੱਚ ਸਮੁੰਦਰ ਦੇ ਪਾਣੀ ਦੇ ਅੰਦਰ 6.8 ਕਿੱਲੋਮੀਟਰ ਲੰਬੀ ਇੱਕ ਸੁਰੰਗ ਵੀ ਸ਼ਾਮਲ ਹੈ।
ਇੰਜੀਨੀਅਰਿੰਗ ਦੀ ਮਿਸਾਲ ਪੇਸ਼ ਕਰਦਾ ਇਹ ‘ਸੀ-ਲਿੰਕ’ ਦੋ ਸ਼ਹਿਰਾਂ ਵਿਚਕਾਰ ਸਫਰ ਦੇ ਸਮੇਂ ਨੂੰ ਲੱਗਭੱਗ ਦੋ ਘੰਟੇ ਤੋਂ ਘਟਾ ਕੇ ਸਿਰਫ 20 ਮਿੰਟ ਕਰ ਦਿੰਦਾ ਹੈ, ਜਿਸ ਨਾਲ ‘ਗ੍ਰੇਟਰ ਬੇਅ ਏਰੀਆ’ ਵਿੱਚ ਕਨੈਕਟੀਵਿਟੀ ਬਿਹਤਰ ਹੋਵੇਗੀ। ਇਸ ਕਾਰੀਡੋਰ ਵਿੱਚ ਪਹਿਲਾਂ ਤੋਂ ਤਿਆਰ ਸੁਰੰਗ ਸੈਕਸ਼ਨ ਅਤੇ ਐਡਵਾਂਸਡ ਵੈਂਟੀਲੇਸ਼ਨ ਸਿਸਟਮ ਲਗਾਇਆ ਗਿਆ ਹੈ। ਤੂਫਾਨਾਂ ਅਤੇ ਤੇਜ਼ ਲਹਿਰਾਂ ਦਾ ਸਾਹਮਣਾ ਕਰਨ ਲਈ ਤਿਆਰ ਕੀਤਾ ਗਿਆ ਇਹ ਲਿੰਕ ਇਨਫਰਾਸਟਰੱਕਚਰ ਇਨੋਵੇਸ਼ਨ ਲਈ ਨਵੇਂ ਮਿਆਰ ਕਾਇਮ ਕਰਦਾ ਹੈ। ਉੱਪਰੋਂ ਵੇਖਣ ‘ਤੇ ਇਹ ਲਿੰਕ ਪਾਣੀ ਦੇ ਉੱਪਰ ਉੱਡਦੇ ਹੋਏ ਕਿਸੇ ਵਿਸ਼ਾਲ ਪੰਛੀ ਜਾਂ ਸਮੁੰਦਰ ਦੇ ਉੱਪਰ ਉੱਡਦੀ ਪਤੰਗ ਵਰਗਾ ਦਿਖਾਈ ਦਿੰਦਾ ਹੈ।
ਇਸ ਲਿੰਕ ‘ਤੇ ਸੁਰੱਖਿਅਤ ਸਫਰ ਲਈ ਟਰੈਫਿਕ ਮੈਨੇਜਮੈਂਟ ਨੂੰ ਬਿਹਤਰ ਬਣਾਇਆ ਗਿਆ ਹੈ, ਜਿਸ ਲਈ ਬਿੱਗ ਡੇਟਾ ਅਤੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਸਮੇਤ ਕਈ ਆਧੁਨਿਕ ਤਕਨੀਕਾਂ ਦੀ ਵਰਤੋਂ ਕੀਤੀ ਗਈ ਹੈ। ਇਸ ਤੋਂ ਇਲਾਵਾ ਸਮੁੰਦਰ ਦੇ ਹੇਠਾਂ ਬਣੀ ਸੁਰੰਗ ਦੀ ਰੋਜ਼ਾਨਾ ਜਾਂਚ ਲਈ ਇੰਟੈਲੀਜੈਂਟ ਰੋਬੋਟਾਂ ਦੀ ਮਦਦ ਲਈ ਜਾਂਦੀ ਹੈ। ਇਹ ਪ੍ਰੋਜੈਕਟ ਲੱਗਭੱਗ 1,37,000 ਵਰਗ ਮੀਟਰ ਵਿੱਚ ਫੈਲਿਆ ਹੋਇਆ ਹੈ, ਜੋ ਕਿ ਲੱਗਭੱਗ 19 ਫੁੱਟਬਾਲ ਮੈਦਾਨਾਂ ਦੇ ਬਰਾਬਰ ਹੈ ਅਤੇ ਲਿੰਗਡਿੰਗਯਾਂਗ ਦੇ ਪਾਣੀਆਂ ਵਿੱਚ ਸਥਿਤ ਹੈ। ਸ਼ੇਨਜ਼ੇਨ-ਜ਼ੋਂਗਸ਼ਾਨ ਲਿੰਕ ਦਾ ਪੱਛਮੀ ਨਕਲੀ ਟਾਪੂ ਹੁਣ ਇਸ ਖੇਤਰ ਵਿੱਚ ਸਮੁੰਦਰ ਦਾ ਇੱਕ ਨਵਾਂ ਮੀਲ ਪੱਥਰ ਬਣ ਗਿਆ ਹੈ।
ਇਸ ਪ੍ਰੋਜੈਕਟ ਵਿੱਚ ਪੁਲ, ਟਾਪੂ, ਸੁਰੰਗਾਂ ਅਤੇ ਪਾਣੀ ਦੇ ਹੇਠਾਂ ਬਣੇ ਇੰਟਰਚੇਂਜ ਸ਼ਾਮਲ ਹਨ। ਇਸ ਨੂੰ ਪੂਰਾ ਕਰਨ ਵਿੱਚ 14 ਸਾਲ ਤੋਂ ਵੱਧ ਦਾ ਸਮਾਂ ਲੱਗਾ ਅਤੇ ਇਸ ਵਿੱਚ 15,000 ਤੋਂ ਵੱਧ ਮਜ਼ਦੂਰਾਂ ਨੇ ਦਿਨ-ਰਾਤ ਕੰਮ ਕੀਤਾ।
